Month: September 2021

راولپنڈی (اے ایف بی ) وفاقی وزیر سائنس و ٹیکنالوجی سینیٹر شبلی فراز نےانڈسٹریل ہیمپ (بھنگ) کی کاشت کے منصوبے کا باضابطہ افتتاح کردیا۔ اس موقع پروفاقی وزیر برائے سائنس و ٹیکنالوجی سینیٹر شبلی فراز نے کہا ہے کہ ہیمپ (بھنگ) کی کاشت کے لئے پالیسی تشکیل دی جاری ہے اور اس کی کاشت کے ساتھ ساتھ ویلیو ایڈیشن ، کوالٹی کنٹرول اور جینٹیک ماڈیفیکیشن بھی کی جائے گی اس کا ادویاتی و صنعتی استعمال کی وجہ سے 100ایکٹر پر بھنگ کی کاشت کی جائے گی اور برآمد کر کے زرمبادلہ کمائیں گے ا ن خیالات کا اظہار انھوں نے پیر مہر علی شاہ بارانی زرعی یونیورسٹی کے روات میں قائم انسٹیٹیوٹ آف ہائیڈروپانکس میں پی سی ایس آئی آرا ہیمپ (بھنگ) کے ویلیو چین ڈویلپمنٹ پروگرام2021 کے حوالے سے منعقدہ تقریب سے خطاب کرتے ہوئے کیا ہیمپ ڈویلپمنٹ پروگرام حکومت پاکستان کا ترقیاتی منصوبہ ہے پاکستان کونسل آف سائنٹیفک اینڈ انڈسٹریل (پی سی ایس آئی آر ) وزارت سائنس اینڈ ٹیکنالوجی اور بارانی زرعی یونیورسٹی اس منصوبے پر عملدرآمد کریں گے اور اس کی کاشت ادویاتی اور صنعتی مصنوعات کی ترقی و پروسیس کے لئے کی جائے گی

اس موقع پر چیئرمین پی سی ایس آئی آر ڈاکٹر سید حسین عابدی، وائس چانسلر بارانی زرعی یونیورسٹی راولپنڈی پروفیسر ڈاکٹر قمر الزمان اور ڈاکٹر عطا الرحمان، ایڈیشنل سیکرٹری وزارت سائنس و ٹیکنالوجی ، سینئر فیکلٹی ممبران اور مختلف تحقیقی ادارں سے ریسرچرز نے بھی شرکت کی ۔ تقریب سے ڈاکٹرسید حسین عابدی چیئر مین پی سی ایس آئی آر اور ڈاکٹر عطا الرحمان، ایڈیشنل سیکرٹری وزارت سائنس و ٹیکنالوجی نے بھی خطاب کیا اس مو قع پر بارانی زرعی یونیورسٹی راولپنڈی اور پی سی ایس آئی آر کے مابین بھنگ کی کاشت کے حوالے سے ایک مفاہمتی یادداشت پر دستخط بھی ہوئے ۔

وفاقی وزیر نے ہیمپ (بھنگ) کے ویلیو چین ڈویلپمنٹ پروگرام کے بارے میں بتایا اور کہا کہ میڈیسنل ہیمپ کے پودوں اور بیجوں کی تیاری پر کام ہو رہا ہے اور خطہ پوٹھوہا ر میں ایگرو بائیوٹیک پارک بھی تیار کیا جائے گا اور بارانی زرعی یونیورسٹی کی ہیمپ منصوبے کے حوالے سے کاوششوں کی تعریف کرتے ہوئے کہا کہ یونیورسٹی اس منصوبے کو آگے بڑھانے میں بہترین کام کر رہی ہے وفاقہ وزیر نے اکیڈیمیا اور انڈسٹری کے روابط کو مضبوط بنانے کے لیے بارانی زرعی یونیورسٹی کے وائس چانسلر کی کاوشوں کو سراہا اور امید ظاہر کی کہ جن کی سخت محنت، لگن اور پالیسیوں کی وجہ سے یونیورسٹی مستقبل قریب میں ملک کی دیگر یونیورسٹیوں کے لیے رول ماڈل ثابت ہوگی

افتتاحی خطاب کے دوران پروفیسر ڈاکٹر قمر الزمان نے کہا کہ بھنگ کی کاشت کا پروگرام پاکستان کی معیشت مضبوط بنانے کے لیے ایک سنگِ میل ثابت ہو گا ۔ بارانی یونیورسٹی کے محققین ملکی ترقی میں اپنا حصہ ڈالنے کے لیے اپلائیڈ سائنسز میں سخت محنت کر رہے ہیں جس کا اندازہ یونیورسٹی میں شروع ہونے والے قومی سطح کے اربوں روپے کے منصوبوں سے بخوبی لگایا جا سکتا ہے ۔ انھوں نے اس پروگرام کے لیے وزیر اعظم عمران خان کی حوصلہ افزائی اور حکومتی مالی امداد کے اقدام کو سراہتے ہوئے کہا کہ جس کی اجازت انھوں نے پچھلے سال بھنگ کے پودے کے فوائد اور اس کی برآمدی صلاحیت کے بارے میں تفصیلی بریفنگ کے بعد دی

لاہور(اے ایف بی) انٹرمیڈیٹ کا رزلٹ لیٹ ہونے سے یونیورسٹیز اور کالجز کے داخلوں کا شیڈول متاثر، بی ایس اونرزپروگرام اور ایسوسی ایٹ ڈگری کے داخلوں میں طلبا کو مشکلات کا سامنا ہے۔تفصیلات کے مطابق انٹرمیڈیٹ کے امتحانات کے نتائج لیٹ ہونےپر طلبا کیلئے بی ایس اونرز پروگرام اور ایسوسی ایٹ ڈگری کے داخلے التوا کا شکار ہیں۔ شہر کی بڑی یونیورسٹیاں اور کالجز داخلوں کا حتمی شیڈول دینے سے قاصر ہیں۔ پنجاب یونیورسٹی اوریونیورسٹی آف ایجوکیشن داخلوں کاحتمی شیڈول جاری نہ کرسکیں۔

ایل سی ڈبلیویو، یونیورسٹی آف ہوم اکنامکس، ویٹرنیری اینڈ اینیمل سائنسز میں داخلوں کا حتمی شیڈول جاری نہ ہوسکا۔ حکومت کی پروموشن پالیسی کی منظوری نہ ملنے سے نتائج کااعلان موخر کیا گیا جبکہ تعلیمی بورڈ کی جانب سےپہلے 30 ستمبر کو نتائج جاری کرنے کا اعلان کیا گیا ہے۔سیکرٹری بورڈز پنجاب کا کہنا تھا کہ پرموشن پالیسی منظوری کے بعد امتحانی نتائج کا شیڈول جاری ہوگا۔

اسلام آباد (اے ایف بی)تحریک انصاف آزادکشمیر کے صدر سردارتنویر الیاس نے آزارکشمیر بھر کی تنظمیں تحلیل نئی تنظیم سازی کےلیے محترک نواجونوں کو اضلاع ، تحصیلوں کی سطح پر اگے لانے کا فیصلہ جن اضلاع تحصلیوں میں گروپ بندی ہے وہاں دونوں گروہوں کو تنظیم سازی کےلیے اعتمادمیں لیاجائے گا

ذرائع نے بتایا کہ تحریک انصاف آزادکشمیر کے صدر سردار تنویر الیاس نے آزادکشمیر بھر میں تحریک انصاف کو محترک اور فعال بنانے کےلیے پرانی تنظیموں کو تحلیل کردیا ہے نئی تنظیم سازی کو مراحلہ وار مکمل کرنے کا فیصلہ کیا ہے اس سلسلے میں تحریک انصاف آزادکشمیر کے جنرل سیکرٹری راجہ منصور خان کو تنظیمیں تحلیل کرنے کا نوٹیکفیشن جاری کرنے کی ہدایت کردی نئی تنظیم سازی مشاورت سے مکمل کی جائے گی

اسلام آباد(اے ایف بی) وزیراعظم آزاد حکومت ریاست جموں و کشمیر سردار عبدالقیوم نیازی نے کہا ہے کہ صحافت ریاست کا چوتھا اور اہم ترین ستون ہے، صحافتی شعبہ کی ترقی کے لیے اقدامات اٹھائیں گے، آزاد کشمیر تحریک آزادی کا بیس کیمپ ہے لیکن افسوس کہ اسے اقتدار کا ریس کیمپ بنا دیا گیا، عمران خان کے ویژن کے مطابق آزاد خطے میں گڈ گورننس اور تحریک آزادی کو فروغ دے کر آر پار پیغام دینگے کہ مظفرآباد حقیقی معنوں میں تحریک کا بیس کیمپ ہے۔ ٹوٹی نلکے کی سیاست کے بجائے مستقبل کو مدنظر رکھ کر تعمیر و ترقی اور خوشحالی کے لیے اقدامات اٹھائیں گے۔ گزشتہ دور حکومت میں راجہ فاروق حیدر خان کا این ٹی ایس کا اقدام اچھا تھا لیکن سابق وزیراعظم جاتے جاتے ساڑھے چار ہزار لوگوں کو مستقل کر کے اپنے اچھے اقدام پر پانی پھیر دیا، جعلی بھرتیوں سمیت سابق دور کی بہت ساری خرابیاں ورثے میں ملی ہیں جنھیں درست کرنے کیلئے کام کر رہے ہیں۔

بلدیاتی انتخابات حکومت کی اولین ترجیح ہیں ایک سال کے اندر اقتدار کو نچلی سطح پر منتقل کرینگے، گراس روٹ لیول کا سیاسی کارکن ہوں، عام آدمی کی مشکلات سے واقف ہوں، عوام کی توقعات پر پورا اترنے کیلئے کوئی کسر روا نہیں رکھیں گے، مسئلہ کشمیر، ریاستی تشخص اور مملکت پاکستان کے وقار پر کوئی آنچ نہیں آنے دونگا۔ ان خیالات کا اظہار انھوں نے یہاں جموں وکشمیر ہاوس اسلام آباد میں کشمیر جرنلسٹس فورم کے وفد سے بات چیت کے دوران کیا۔ وفد کی قیادت فورم کے صدر زاہد اکبر عباسی کر رہے تھے، وفد میں فورم کے سیکرٹری جنرل سردار عقیل انجم، سیکرٹری فنانس راجہ ماجد افسر، جوائنٹ سیکرٹری عابد ہاشمی، چیف آرگنائزر اعجاز خان، سیکرٹری اطلاعات اقبال اعوان، ممبر گورننگ باڈی راجہ خالد شامل تھے۔ اس موقع پر اے کے این ایس کے صدر سردار زاہد تبسم بھی موجود تھے۔

وزیراعظم سردار عبدالقیوم نیازی نے کہا کہ میڈیا ہماری رہنمائی کرے اور درست سمت نشاندہی کرے ہم ہر مثبت تنقید اور مشورے کا احترام کرینگے۔ وزیراعظم نے کہا کہ خطے کو رول ماڈل بنانے کیلئے کوشاں ہوں جبکہ صدر ریاست بیرسٹر سلطان مسئلہ کشمیر اجاگر کر کے تحریک آزادی کشمیر کے مشن پر گامزن ہیں۔ صدر،وزیراعظم سمیت حکومت و ریاست کے تمام شعبے متحد ہیں اور ہم سب ملکر وزیراعظم پاکستان عمران خان کے ویژن کو آگے بڑھا رہے ہیں۔ وزیراعظم نے کہا کہ گڈ گورننس اور تحریک آزادی کے بعد خطے کی تعمیر و ترقی ترجیح ہے۔ آزاد کشمیر میں انفراسٹرکچر کی بہتری لا کر سیاحت کو فروغ دینگے، خطے کی تمام شاہرات بہتر کرینگے۔ میرا تعلق کنٹرول لائن کے حلقہ سے ایل او سی پر آباد لوگوں کی مشکلات سے بخوبی آگاہ ہوں، کنٹرول لائن سے ملحقہ تمام حلقوں کے مسائل ترجیحی بنیادوں پر حل کیے جائیں گے۔

اسلام آباد (اے ایف بی ) قومی اسمبلی کی قائمہ کمیٹی برائے اقتصادی امور کے اجلاس کے دوران پاکستان کا بیرونی قرضہ 122 ارب ڈالر سے زائد ہونے کا انکشاف ہوا ہے۔ میر خان محمد جمالی کی زیر صدارت قومی اسمبلی کی قائمہ کمیٹی برائے اقتصادی امور کا اجلاس ہوا، جس میں ایڈیشنل سیکریٹری اقتصادی امور ذوالفقار حیدر نے کمیٹی کو پاکستان کے بیرونی قرض اور ڈالر کی قدر میں کمی سے ہونے والے اثرات اور دیگر معاشی امور پر بریفنگ دی۔

قائمہ کمیٹی کے ارکان کو دی گئی بریفنگ میں بتایا گیا کہ جون 2018 میں پاکستان کا کل بیرونی قرضہ 96 ارب ڈالر تھا، 3 سال میں بیرونی قرض میں 26 ارب ڈالر سے زائد کا اضافہ ہوا، اس طرح اب پاکستان پر بیرونی واجب الادا قرض کا حجم 122 ارب 44 کروڑ ڈالر سے زائد ہے۔ذوالفقار حیدر نے بتایا کہ پیرس کلب کا کل قرضہ 3 ارب 78 کروڑ 50 لاکھ ڈالر ہے، جس میں 2 ارب 97 کروڑ ڈالر سے زائد قرض اور 81 کروڑ 40 لاکھ ڈالر شرح سود ہے، کورونا کی وجہ سے پیرس کلب کی جانب سے قرضوں پر ریلیف دیا گیا۔ جس پر کمیٹی رکن قیصر احمد شیخ نے استفسار کیا کہ یہ ریلیف جب دیا گیا اس وقت ڈالر آج سے 50 روپے سستا تھا، اب ہمیں نئے ایکسچینج ریٹ کے مطابق ادائیگی کرنی ہوگی اس سے پاکستان کا نقصان ہوا۔

سیکرٹری اقتصادی امور اسد حیاء الدین نے بتایا کہ عالمی مالیاتی اداروں کی جانب سے 124 منصوبوں کے لئے 22 ارب 37 کروڑ ڈالر سے زائد قرض لیا گیا ہے، کورونا کے دوران اقتصادی امور ڈویژن نے 4.1 ارب ڈالر کے قرض کا انتظام کیا، 65 کروڑ 30 لاکھ ڈالر کی ویکسین کی خریداری کی۔عائشہ غوث پاشا نے کہا کہ آئی ایم ایف کے ساتھ حکومت کے کئے گئے وعدے کے مطابق 172 یا 174 روپے کا ڈالر رکھنا ہے، اگلے اجلاس میں ہمیں بتایا جائے کہ روپے کی قدر میں کمی سے کیا نقصانات ہوئے ہیں۔ اجلاس میں وزارت خزانہ اور دیگر متعلقہ اداروں کے حکام بھی موجود ہوں گے۔

اسلام آباد (اے ایف بی) وفاقی وزیر داخلہ شیخ رشید نے کہا ہے کہ (ن) لیگ اب 2 کے بجائے 3 دھڑوں میں تقسیم ہوگی۔ آن آرائیول ویزے کی سہولت 50 ممالک سے بڑھا کر 65 کرنے جارہے ہیں، پاسپورٹ اورشناختی کارڈ کے معاملے پر نظر ثانی کر نے جارہے ہیں، پاسپورٹ اور شناختی کارڈ کی سیکیورٹی کے لئے 15 مزید فیچرز لارہے ہیں، پاکستان خطے میں ای پاسپورٹ جاری کرنے والا پہلا ملک ہو گا۔وزارت داخلہ اسلام آباد میں ہفتہ وار پریس بریفنگ کے دوران شیخ رشید نے کہا کہ ایف آئی اے کو سائبر کرائم کی ایک لاکھ درخواستیں مو صول ہوئی ہیں ، سائبر کرائمز والوں کو 2 ارب کے فنڈ جاری کررہے ہیں،نادرا نے 75 لاکھ لوگوں کو ویکسین سرٹیفکیٹ جاری کئے، جعلی ویکسی نیشن کےمعاملے پر نادرا کا کوئی قصور نہیں ہے، نادرا کو ہدایت کی ہے آئندہ ایسی غلطی نہ ہو۔

وزیر داخلہ نے کہا کہ دستانے والے ہاتھ پاکستان کونقصان پہنچانے کی کوشش کررہے ہیں، دہشت گردی کا خطرہ موجود ہے لیکن پاک فوج دہشت گرد سے نمٹنے کی بھرپور صلاحیت رکھتی ہے، نیوزی لینڈ ٹیم کے دورے کو منسوخ کرنے والوں کے قریب پہنچ چکے ہی، انہیں پوری دنیا کے سامنے لائیں گے، سنگاپور سے بھارت کے رابطوں اور 12 اکاؤنٹس پر مزید پیش رفت سامنے آرہی ہے۔

شیخ رشید نے کہا کہ شہبازشریف کوضمانت دیتےہیں کہ 2023 کے انتخابات شفاف اور غیر جانبدارانہ ہوں گے، الیکشن کمیشن اور حکومت قریب آرہے ہیں جواچھی بات ہے، الیکٹرانک ووٹنگ مشین سے انتخابات شفاف ہوں گے، ملک میں جوڈو کراٹے کا ماحول کم ہورہا ہے، (ن) لیگ جب الیکشن میں جائےگی اس وقت ایک نیا سیاسی ماحول ہوگا۔ (ن) لیگ انتشار اور جوڈو کراٹے سے برباد ہوگی، شہباز شریف کے خاندان میں وراثت کی لڑائی چل رہی ہے، وہ اپنے لئے دم درود کرائیں، مسلم لیگ (ن) کو 2 کی بجائے 3 گروپ بنتے ہوئے دیکھ رہا ہوں، (ن) لیگ کے گھر کی باتیں گھر میں رہیں تو اچھی بات ہے۔

کراچی(اے ایف بی) مسلم لیگ (ن) کے رہنما اور سابق گورنر سندھ محمد زبیر کی مبینہ نازیبا وڈیو وائرل ہونے سے متعلق وکلاء نے سٹی کورٹ تھانے میں سابق گورنر پر مقدمہ دائر کرنے کے لیے مقامی عدالت میں درخواست دائر کردی۔ کراچی کی مقامی عدالت میں ایڈووکیٹ مظہر شیخ اور اعجاز جتوئی نے محمد زبیر کے خلاف مقدمے کے اندراج کے لیے درخواست جمع کرائی ہے۔

درخواست میں موقف اختیار کیا گیا ہے کہ گورنر کے عہدے پر رہ کر محمد زبیر نے جرم کیا۔ ان پر مقدمہ دائر کر کے تحقیقات کی جائے کہ وڈیو کے ذریعے کہیں خاتون کو بلیک میل تو نہیں کیا جا رہا۔ ہو سکتا ہے وڈیو کے ذریعے متاثرہ خاتون کو بلیک میل کیا جا رہا ہو۔ اگر سابق گورنر کو بھی بلیک میل کیا جا رہا ہے تو اس پر بھی تحقیقات ہونی چاہیے۔

واضح رہے کہ محمد زبیر کی گزشتہ روز ایک نازیبا وڈیو سوشل میڈیا پر وائرل ہوئی تھی۔ محمد زبیر نے اس وڈیو کو جعلی قرار دیتے ہوئے کہا ہے کہ اس کے پیچھے جو بھی ہے اس نے یہ انتہائی شرمناک اور غلیظ حرکت کی ہے ، میں نے انتہائی ایمانداری، دیانت اور عزم کے ساتھ اپنے ملک کی خدمت کی ہے اور اس کی بہتری کے لیے آواز اٹھاتا رہوں گا۔

اسلام آباد(اے ایف بی)ریسرچ انسٹی ٹیوٹ پاٸیڈ کی رپورٹ کے مطابق پاکستان میں ہر روز 1200 بچے سگریٹ نوشی کی طرف جا رہے ہیں جو انتہاٸی خوفناک اعداد و شمار ہیں رپورٹ کے اعداد و شمار کے مطابق سگریٹ نوشی میں مبتلا ہونے والے بچوں کی عمریں 13 سے 17 سال کے درمیان ہیں ۔

رپورٹ کے مطاب پاکستان میں ہر سال اسی ارب سگریٹ فروخت ہوتے ہیں جو انتہاٸی خوفناک حقاٸق ہیں جس کی وجہ سے سالانہ ایک لاکھ ستر ہزار سگریٹ نوش مختلف بیماریوں میں مبتلا ہو کر موت کے منہ میں چلے جاتے ہیں ۔ اس وجہ سے حکومت کو صحت کے شعبے میں تقریبا 670 ارب روپے کا نقصان ہو رہا ہے ۔

تمباکو نوشی کی صنعت سے حکومت کو ٹیکس کی مد میں محض 37 ارب روپے حاصل ہوتے ہیں ضرورت اس امر کی ہے کہ تمباکو کی صنعت پہ زیادہ سے زیادہ ٹیکس لگایا جاۓ اور کھلے سگریٹ پہ پابندی کے ساتھ ساتھ اس بات کو یقینی بنایا جاۓ کہ دکاندار بچوں کو سگریٹ فروخت نہ کریں ۔ ان اقدامات سے سگریٹ کی فروخت میں نہ صرف کمی آۓ گی بلکہ سگریٹ پینے والوں کی حوصلہ شکنی بھی ہو گی,۔

سعودی عرب (اے ایف بی) سعودی حکومت کی جانب سے پاکستانی طلبا کو سکالر شپ دینے کا اعلان کیا گیا ہے جس کے تحت سعودی عرب کی 25 جامعات میں پاکستانی طلبا تعلیم حاصل کریں گے۔

ذرائع کے مطابق سعودی عرب میں تعینات پاکستان کے سفیر بلال اکبر نے کہا ہے کہ سکالر شپ 75 فیصد پاکستان اور 25 فیصد سعودی عرب میں زیر تعلیم طلبا کے لیے ہے جبکہ سکالر شپ کے ذریعے پاکستانی طلبا ڈپلومہ، بیچلرز، ماسٹرز اور پی ایچ ڈی کرسکیں گے۔

بلال اکبر کا کہنا تھا کہ سکالر شپ میں قانون، انجینئر، ایڈمنسٹریشن، معاشیات اور کمپیوٹر سائنس کے مضامین شامل ہیں جبکہ سکالر شپ میں ہر سال طلبا کی تعداد میں اضافہ ہوتا رہے گا اور اس حوالے سے سعودی وزارت تعلیم کی شرائط پاکستانی سفارتخانے کی ویب سائٹ پر موجود ہیں

لاہور ( اے ایف بی) کسٹم حکام نے بیرون ملک جانیوالے مسافروں کیلئے ڈیکلریشن فارم جمع کروانا لازمی قرار دیتے ہوئے کہا مسافر قیمتی اشیا ڈیکلیئر کرنے کے پابند ہوں گے۔تفصیلات کے مطابق بیرون ملک جانیوالے مسافروں کیلئے لاہور کسٹم نے ایپ متعارف کرادی ، جس میں مسافروں کوآن لائن ڈیکلریشن فارم جمع کروانے کی سہولت فراہم کردی گئی ہے۔

کسٹم حکام کا کہنا ہے کہ لاہورائیرپورٹ سے ڈیکلریشن فارم جمع کروانا لازمی قراردیاگیاہے اور بیرون ملک جانیوالے مسافر قیمتی اشیا ڈیکلیئر کرنے کے پابند ہوں گے۔مسافروں کوآن لائن فارم فل کرنے کی سہولت بھی فراہم کی گئی، ڈیکلریشن فارم میں مسافروں سے سامان کی تفصیلات پوچھی گئی، فارم میں درج نہ ہونیوالی اشیابرآمد ہونے پر ضبط کرلیےجائیں گے۔