Month: February 2022

ماسکو(اے ایف بی) ہم روس کے صدر ولادیمیر پیوٹن کی حالیہ پیش رفت کے بارے میں بات کر رہے ہیں جنہوں نے 24 فروری کو یوکرین کے خلاف جنگ شروع کردی۔ایسے جنگ کے ماحول میں بلغاریہ کی نامور خاتون نجومی آنجہانی بابا وانگا کی ایک پیش گوئی کی کافی بات کی جارہی ہے۔9/11 کے دہشت گرد حملوں اور بریگزٹ سمیت عالمی واقعات کی پیش گوئی کرنے والی بابا وانگا نے روس کے لیے بھی پیشی گوئی کی تھی۔غیر ملکی میڈیا رپورٹس کے مطابق 85 سال کی عمر میں انتقال کر جانے والی بابا وانگا نے برطانوی اخبار ڈیلی میل کے ترجمان کو بتایا تھا کہ یورپ کے بنجر ہونے کے بعد روس دنیا پر حمکرانی کرے گا۔انہوں نے کہا تھا کہ ‘سب برف کی طرح پگھل جائے گا لیکن صرف ولادیمیر پیوٹن باقی رہ جائے گا’ جبکہ انہوں نے پیش گوئی کرتے ہوئے یہ بھی کہا تھا کہ روس کو کوئی نہیں روک سکتا۔بابا وانگا کون تھیں اور ان کی پیش گوئیوں کی اتنی اہمیت کیوں ہے؟بابا وانگا ایک حادثے میں نابینا ہوئی تھیں جن کے مطابق یہ کہا جاتا ہے کہ ان میں مستقبل دیکھنے کا ہنر قدرتی طور پر موجود تھا، ان کی پیدائش 1911 میں ہوئی تھی جب کہ موت 1996 میں ہوئی۔وہ نہ صرف جڑی بوٹیوں کی حکیم بلکہ مذہبی پیشوا بھی تھیں جنہوں نے سال 5079 تک کی پیش گوئیاں کی ہیں کیونکہ ان کا خیال تھا کہ اس کے بعد دنیا کا اختتام ہوجائے گا۔غیر ملکی میڈیا رپورٹس کے مطابق بابا وانگا کی جانب سے کی گئی پیش گوئیوں میں سے 80 فیصد درست ثابت ہوئیں

اسلام آباد(اے ایف بی)مائع پیٹرولیم گیس (ایل پی جی) کا گھریلو سلنڈر 318 روپے مزیدمہنگا کردیا گیا۔اس حوالے سے جاری نوٹیفکیشن کے مطابق ایل پی جی کا گھریلو سلنڈر 318 روپے 74 پیسے مہنگا ہوگیا ہے جس کے بعد 11.8 کلو کے گھریلو سلنڈر کی نئی قیمت 2758 روپے 67 پیسے ہوگئی ہے۔نوٹیفکیشن کے مطابق ایل پی جی کی فی کلو قیمت میں 27 روپے ایک پیسے اضافہ ہوا ہے، ایل پی جی کی فی کلو نئی قیمت 233 روپے 78 پیسے ہوگئی ہے، ایل پی جی کی نئی قیمت کا اطلاق یکم مارچ سے ہوگا۔نوٹیفکیشن کے مطابق ایل پی جی کا گھریلو سلنڈر اس وقت2439 روپے 93 پیسے کا ہے

کراچی (اے ایف بی) کاروباری ہفتے کے پہلے ہی روز پاکستان میں فی تولہ سونے کی قیمت 650 روپے بڑھ گئی۔ سندھ صرافہ بازار ایسوسی ایشن کے مطابق پیر کو سونے کی فی تولہ قیمت میں 650 روپے کا اضافہ ہوا جس کے بعد اس کی نئی قیمت ایک لاکھ 28 ہزار 600 روپے ہوگئی۔ دس گرام سونے کی قیمت 558 روپے اضافے سے ایک لاکھ 10 ہزار 254 روپے ہوگئی۔ انٹرنیشنل گولڈ مارکیٹ میں ٹریڈنگ کے دوران فی اونس سونے کی قیمت 15 ڈالر اضافے کے بعد 1905 ڈالر رہی

کراچی(نیوز ڈیسک )پاکستانی روپے کے بے قدری اور امریکی ڈالر کی قدر میں اضافے کا رجحان آج بھی جاری رہا۔اسٹیٹ بینک آف پاکستان کی جانب سے جاری بیان کے مطابق انٹربینک تبادلہ مارکیٹ میں ڈالر 36 پیسےمہنگا ہوکر177 روپے 47 پیسے کا ہوگیا ہے۔اوپن مارکیٹ میں ڈالر کا بھاؤ 178 روپے 50 پیسے پر برقرار ہے

کراچی(اے ایف بی ) شب معراج ، صوبہ بھر کے سرکاری و نجی تعلیمی اداروں میں عام تعطیل کااعلان کر دیا گیا ۔ تفصیلات کے مطابق حکومت سندھ نے یکم مارچ بروز منگل شب معراج کے موقع پر سندھ بھر کے سرکاری و نجی تعلیمی اداروں میں عام تعطیل کااعلان کردیا ہے ۔سیکریٹری تعلیم سندھ کے مطابق اس سال بھی شب معراج نہایت عقیدت واحترام کے ساتھ منائی جائے گی۔اس دوران محکمہ تعلیم سندھ نے یکم مارچ کو شبِ معراج کے موقع پر عام تعطیل کا اعلان کیا ہے، جس کے تحت صوبے کے تمام سرکاری و نجی اسکول بند رہیں گے۔فیصلے کا اطلاق سندھ کے تمام سرکاری و نجی تعلیمی اداروں پر ہوگا

اسلام آباد(نیوز ڈیسک )وزیراعظم عمران خان نے اعلان کیا ہے کہ پیٹرول کی قیمت میں 10 روپے اور بجلی کی قیمت فی یونٹ 5 روپےکم کی جائے گی اور اگلے بجٹ تک دونوں چیزوں کی قیمت میں کوئی تبدیلی نہیں ہوگی۔وزیر اعظم نے پیر کو قوم سے خصوصی خطاب کرتے ہوئے کہا کہ ملکی خارجہ پالیسی پر خصوصی طور پر گفتگو کرتے ہوئے کہا کہ میں نے حال ہی میں دو دورے کیے، ان میں سے ایک چین اور دوسرا روس کا تھا۔ان کا کہنا تھاکہ دنیا میں تیزی سے صورتحال بدل رہی ہے اور اس کے پاکستان پر اثرات مرتب ہو رہے ہیں۔انہوں نے کہا کہ جب سے میں نے سیاست شروع کی تو میری ہمیشہ سے خواہش تھی کہ پاکستان کی خارجہ پالیسی آزاد ہو، آزاد خارجہ پالیسی کا مطلب یہ ہوتا ہے کہ قوم اپنے لوگوں کے فائدے کے لیے خارجہ پالیسی بنائے اور وہ پالیسی نہ بنائے جو کسی اور کے فائدے کا سبب بنے اور اپنے ملک کو نقصان پہنچا دے۔ ان کا کہنا تھا کہ ہم نے جب امریکا کی دہشت گردی کے خلاف جنگ میں حصہ لیا تو میں شروع سے کہتا تھا کہ ہمارا اس جنگ سے کوئی تعلق نہیں تھا، 9/11 میں کوئی پاکستانی ملوث نہیں تھا، میں اس وقت سے کہتا تھا کہ ہمیں اس میں شرکت نہیں کرنی چاہیے۔ عمران خان نے کہا کہ ہم نے پہلے امریکا کی جنگ میں سوویت یونین کے خلاف شرکت کی اور جب 10سال کے بعد پھر شرکت کی تو پہلے وہ جہاد تھا لیکن جب امریکا افغانستان آیا تو اس نے اسے دہشت گردی کا نام دے دیا، میں اس پالیسی کے خلاف تھا کیونکہ یہ خارجہ پالیسی پاکستانیوں کے فائدے کے لیے نہیں بنائی گئی۔ ان کا کہنا تھا کہ اس جنگ کی وجہ سے 80ہزار پاکستانیوں کی شہادتیں ہوئیں، 35لاکھ لوگوں کی نقل مکانی ہوئی، قبائلی علاقہ تباہ ہوا، ملک کو 150ارب ڈالر سے زائد نقصان ہوا لیکن اس کی سب سے شرمناک بات یہ تھی کہ دنیا کی تاریخ میں پہلی مرتبہ ایک ملک کسی کی حمایت میں جنگ لڑ رہا تھا اور وہ ملک اسی ملک پر بمباری کررہا تھا۔ انہوں نے کہا کہ ہمارے ملک میں 400 سے زائد ڈرون حملے کیے گئے، جنرل مشرف کے دور میں صرف 10 ڈرون حملے کیے گئے لیکن جو دو جمہوری لیڈرز آصف زرداری اور نواز شریف آئے تو ان کے 10سال میں 400ڈرون حملے کیے گئے۔ وزیراعظم نے کہا کہ آزاد خارجہ پالیسی ہوتی تو ان دونوں رہنماؤں کو امریکا کو کہنا چاہیے تھا کہ آپ کی بمباری سے ہمارے بچیں، عورتیں اور بے قصور لوگ مررہے ہیں، تو کیا اس وقت دو جمہوری رہنماؤں کو اس پر کوئی اسٹینڈ نہیں لینا چاہیے تھا، اس پر ایک بیان تک نہیں دیا بلکہ امریکی صحافی نے اپنی کتاب میں لکھا کہ آصف زرداری نے امریکی آرمی چیف سے کہا کہ ڈرون حملوں میں کولیٹرل نقصان سے مجھے کوئی فرق نہیں پڑتا۔ ان کا کہنا تھا کہ یہ اس لیے تھا کہ یہ ملک کی بہتری کے بجائے اپنے پیسے بچانے کے لیے کرتے ہیں اور آج جنگ کے آغاز کے بعد سے روس کے بڑے بڑے کاروباری افراد کے امریکا اور برطانیہ نے اپنے بینکوں میں موجود اثاثے منجمد کرنے شروع کردیے ہیں، اس لیے ہمارے ملک کی پالیسی آزاد ہو ہی نہیں سکتی۔ انہوں نے قوم کو پیغام دیتے ہوئے کہا کہ اگر آپ اس ملک میں آزاد خارجہ پالیسی چاہتے ہیں تو کبھی اس پارٹی کو ووٹ نہ دیں جس کے پیسے، دولت اور جائیداد پاکستان سے باہر پڑی ہے کیونکہ وہ کبھی آزاد خارجہ پالیسی نہیں بنائیں گے۔ عمران خان نے کہا کہ میں نے جتنے بھی دورے کیے جس میں دو چین کے اہم دورے تھے، اس میں ہمارے ملک کو بھی عزت ملی اور وقت ثابت کرے گا کہ ہم نے چیبن اور روس دونوں جگہ زبردست بات چیت کی۔ انہوں نے دورہ روس کی وضاحت دیتے ہوئے کہا کہ ہمیں روس اس لیے جانا تھا کیونکہ ہمیں 20لاکھ ٹن گندم روس سے امپورٹ کرنی ہے اور دوسری اہم چیز یہ ہے کہ روس دنیا کا وہ ملک ہے جس میں دنیا کی 30فیصد گیس ہے، تو پاکستان کی گیس میں کمی کے پیش نظر ہم نے ان سے گیس کے معاہدے کیے ہیں اور ہم ان سے گیس امپورٹ کریں گے جبکہ چین سے ہونے والے معاہدے خصوصاً سی پیک کے دوسرے مرحلے کے حوالے سے بھی تفصیلات سامنے آ جائیں گی

اسلام آباد(اے ایف بی )وزیرِ دفاع پرویز خٹک کا کہنا ہے کہ وزیراعظم عمران خان بہت جلد پیٹرول اور بجلی کی قیمتوں میں کمی کا اعلان کریں گے۔نوشہرہ میں کارکنوں سے خطاب کرتے ہوئے پرویز خٹک نے کہا کہاپوزیشن لانگ مارچ، عدم اعتماد کا شوق پورا کرے، وزیراعظم عمران خان کی حکومت کہیں نہیں جا رہی۔پرویز خٹک نے کہا کہ وزیراعظم عمران خان بہت جلد قوم سے خطاب کریں گے۔ان کا کہنا تھا کہ وزیراعظم عمران خان عدم اعتماد کے اصل حقائق قوم کے سامنے لائیں گے اور جلد پیٹرول اور بجلی کی قیمتوں میں کمی کا اعلان بھی کریں گے

کراچی(اے ایف بی)شہر قائد کراچی میں الآصف اسکوائر کے قریب گزشتہ رات جھگیوں میں ہونے والی آتشزدگی کے واقعے میں 2 سگے بھائی جاں بحق ہو گئے۔ریسکیو حکام کا کہنا ہے کہ آگ سے جھلس کر زخمی ہونے والا 20 سال کا نوجوان دوران علاج دم توڑ گیا۔ گزشتہ روز خاتون کا چھوٹا بیٹا بھی جھلسنے سے جاں بحق ہو گیا تھا۔جاں بحق نوجوان کی والدہ کی جانب سے پریس کلب کے باہر میت رکھ کر احتجاج کیا جا رہا ہے۔اس ضمن میں جاں بحق ہونے والے لڑکوں کی والدہ نے بتایا کہ گزشتہ روز کچھ لوگ آئے اور کہا کہ گھر خالی کرو، دوسرا گھر دیکھنے گئی اور جب واپس آئی تو گھر میں آگ لگی ہوئی تھی۔متاثرہ خاتون کا کہنا تھا کہ جاں بحق چھوٹے بیٹے کی عمر 8 سال اور بڑے کی عمر 20 سال تھی، مجھے انصاف دیا جائے اور ملزمان کو گرفتار کیا جائے

کراچی(اے ایف بی) تحریک انصاف کے سندھ حقوق مارچ میں جیب کتروں کی چاندنی ہو گئی، متعدد رہنماؤں اور کارکنوں کو لوٹ لیا گیا۔تفصیلات کے مطابق پی ٹی آئی سندھ حقوق مارچ میں جیب کترے سرگرم ہو گئے، مارچ میں شریک متعدد رہنما اور کارکن لٹ گئے، میڈیا سے وابستہ افراد کو بھی نہیں بخشا گیا۔مارچ کے پہلے دن ہی عوامی نمائندے، پی ٹی آئی سیکیورٹی اسکواڈ اور میڈیا نمائندوں کی جیبوں کا صفایا کیا گیا، ایم پی اے راجہ اظہر کی جیب سے 35 ہزار روپے نکال لیے گئے۔سیکیورٹی اسکواڈ کے خالد بلوچ اور رحمت کے موبائل فون چوری ہو گئے، میڈیا نمائندوں کے موبائل فون بھی جیبوں سے نکال لیے گئے، کئی افراد کے پرس بھی چوری ہو گئے۔جیبیں مارنے کے واقعات کمو شہید، سکھر اور شکار پور میں ہوئے، پی ٹی آئی رہنماؤں نے ہدایات جاری کی ہیں کہ رش والے مقامات پہ سب اپنی جیبوں کا خیال رکھیں

کراچی(اے ایف بی)کراچی کے مختلف علاقوں میں دیواریں گرنے کے واقعات میں 3 بچوں سمیت پانچ افراد جاں بحق ہوگئے، بچوں کی تدفین کردی گئی۔ملیر بکرا پیڑی کے قریب گھر کی دیوار گر گئی جس کے ملبے تلے دب کر 3 بچے جاں بحق ہوگئے، مرنے والوں میں 2بچیاں اور ایک بچہ شامل ہے۔ریسکیو ذرائع نے بتایا کہ جاں بحق ہونے والے بچوں کی شناخت (بچی) آمنہ بی بی دختر گلاب شاہ عمر 05 سال، (بچی) زینب دختر گلاب شاہ عمر 06 سال، (بچہ) ارسلان شاہ ولد اکرم شاہ عمر07 سال ہے۔تینوں بچوں کو مقامی قبرستان میں سپردخاک کردیا گیا۔دوسرا واقعہ کورنگی گودام چورنگی پر پیش آیا جہاں تعمیراتی کام کے دوران دیوار گرنے سے دو افراد جاں بحق اور چار افراد زخمی ہوئے۔اطلاعات کے مطابق کورنگی گودام چورنگی پر ایک کمپنی سے متصل خالی پلاٹ پر تعمیراتی کام جاری تھا کہ یہ حادثہ پیش آیا۔عینی شاہدین کے مطابق حادثے کی فوری طور پر پولیس کو بھی اطلاع دی گئی لیکن پولیس موقع پر نہ پہنچ سکی اور لوگوں نے اپنی مدد آپ کے تحت لاشوں اور زخمیوں کو نکال کر اسپتال منتقل کیا۔اس حوالے سے ڈی ایس پی کورنگی کا کہنا ہے کہ حادثے کے حوالے سے تفصیلات حاصل کررہے ہیں۔دوسری جانب ذرائع کا کہنا ہے کہ پولیس کے جائے حادثہ پر بروقت نہ پہنچنے کی وجہ یہ ہے کہ پولیس افسران پی پی کی عوامی حقوق لانگ مارچ کی ڈیوٹی پر موجود تھ