Blog

لاہور(مانیٹرنگ ڈیسک )بلاول بھٹو کب دلہا بنیں گئے اور اس کا ٹاسک کس کو دے دیا گیا ہے اس حوالے سے جیالوں کے لئے اہم خبرآگئی ہے این نجی ٹی وی کے مطابق سابق صدر اور پیپلزپارٹی کے شریک چئیرمین آصف علی زرداری ان دنوں تحریک عدم اعتماد بارے انتہائی متحرک ہیں اور ان کی اس ضمن میں روزانہ کی بنیادوں پر سیاست دانوں سے ملاقاتیں ہوتی رہی ہیں اسی تناظر ان کی منصورہ لاہور میں امیر جماعت اسلامی سراج الحق سے بھی ملاقات ہوئی اس دوران جماعت کے ایک سینئررکن نے سابق صدر اور پیپلزپارٹی کے شریک چئیرمین آصف علی زرداری سے بلاول بھٹوکی شادی بارے استفسار کیا کہ اب آپ کو بیٹے کی شادی کر دینی چاہیے جس پر قہقے لگ گئے اس پرآصف علی زرداری نے جواب دیا کہ پھرلڑکی بھی جماعت اسلامی سے ہونی چاہیے اس دوران سابق وزیراعظم راجہ پرویز اشرف نے انکشاف کیا کہ ان کے سسرالی بھی جماعت اسلامی سے ہی تعلق رکھتے ہیں

راولپنڈی(اے ایف بی)پاکستانی شاہینوں کی جانب سے بھارتی جارحیت کا منہ توڑ جواب دینے کے 3 سال مکمل ہو گئے۔27 فروری 2019 کو پاک فضائیہ کے شاہینوں نے بھارت کا گھمنڈ خاک میں ملاتے ہوئے بھارتی فضائیہ کے دو جنگی طیارے مار گرائے تھے۔پاک فوج نے آزاد کشمیر میں پیرا شوٹ سے اترنے والے اور مقامی افراد کے ہاتھوں لہو لہان ہونے والے بھارتی پائلٹ ابھی نندن کو پکڑ لیا اور پھر جذبہ خیر سگالی کے تحت اسے چائے پلا کر رخصت کیا گیا۔بھارتی ونگ کمانڈر کی وردی، جہاز کی باقیات اور چائے کا کپ پی اے ایف میوزیم کراچی کی آپریشن سوئفٹ ری ٹورٹ گیلری میں محفوظ ہیں۔پی اے ایف میوزیم کراچی میں رکھے سرپرائز بھارت کو غلط فہمی کے آسمان سے گرانے والے زمینی حقائق بتا رہے ہیں

لاہور(اے ایف بی)آسٹریلیا کی فل اسٹرینتھ کرکٹ ٹیم 24 برس بعد پاکستان کے دورے پر پہنچ گئی ہے۔پیٹ کمنز کی قیادت میں آسٹریلین ٹیم اسلام آباد پہنچی جہاں پاکستان کرکٹ بورڈ کے حکام نے مہمان ٹیم کا استقبال کیا۔پاکستان پہنچنے والے کھلاڑیوں میں کپتان پیٹ کمنز کے علاوہ اسٹیو اسمتھ، مارنوس لبوشین، جوش ہیزل ووڈ، مچل مارش، عثمان خواجہ، ناتھن لیون، مچل اسٹارک اور دیگر کھلاڑی شامل ہیں۔کرکٹ آسٹریلیا کی جانب سے بھی سوشل میڈیا پر پیٹ کمنز کی ایک تصویر شیئر کی گئی ہے جس میں انہیں اسلام آباد ائیر پورٹ پر پہنچنے کے بعد خوش گوار موڈ میں دیکھا جا سکتا ہے۔آسٹریلین ٹیم دو روز بائیو سکیور ببل میں رہے گی اور دو روز بعد کھلاڑیوں کے کورونا ٹیسٹ ہوں گے۔کورونا ٹیسٹ منفی آنے والے کھلاڑی پریکٹس سیشن میں حصہ لیں گے اور دونوں ٹیموں کے درمیان پہلا ٹیسٹ 4 مارچ سے راولپنڈی میں شروع ہو گا۔خیال رہے کہ آسٹریلوی کرکٹ ٹیم تقریباً 24 برس بعد پاکستان کا دورہ کر رہی ہے اور دونوں ٹیموں کے درمیان تین ٹیسٹ، تین ون ڈے اور صرف ایک ٹی ٹوئنٹی میچ کھیلا جائے گا۔

چترال(اے ایف بی)خیبر پحتون خواہ کے پبلک سروس کمیشن میں اسسٹنٹ سب انسپکٹر ASI کی 420 آسامیوں کیلئے سال 2018 میں اشتہار دیا تھا۔ گریڈ گیارہ کی ان چار سو بیس آسامیوں کیلئے اس وقت 52630 امیدواروں کی درخواستیں موصول ہوئی۔اگلے مرحلے میں Physical Endurance Test ہوا جس میں چودہ ہزار چھ سو ترپن امیدوار کامیاب ہوئے۔ امیدواران کا تعداد زیادہ ہونے کی وجہ سے پبلک سروس کمیشن نے اپنے کمیشن ایکٹ کے احتیارات استعمال کرتے ہوئے 23 نومبر 2019 کو سکریننگ ٹیسٹ مقرر کیا جس میں نو ہزار چار سو تیرہ امیدوار کامیاب ہوئے۔ کمیشن نے تمام امیدواروں کیلئے چوبیس سے پچیس نومبر 2020 کو ایک تحریری امتحان منعقد کیا جس انگلش، اردو، جنرل نالج اور کمپیوٹر پر مبنی پرچے شامل تھے۔ اس مقابلے کے امتحان میں 1043 امیدواران کامیاب ہوئے جنہوں نے اگلے مرحلے کیلئے کوالیفائڈ کیا۔ اس کے بعد تمام امیدواروں سے نفسیات پر مبنی ٹیسٹ اور انٹرویو لیا گیا جس میں سب کامیاب ہوئے۔ آحری مرحلے میں 1043 امیدواران کیلئے فائنل انٹریو گیارہ اکتوبر 2021 کو شروع ہوا جو سات جنوری 2022 کو احتتام پذیر ہوا۔ کمیشن کے رولز کے مطابق فائنل انٹریو حتم ہونے کے چار دن بعد رزلٹ شائع کرنا ہوتا ہے۔ ان امیدواران کی نمائندگی کرتے ہوئے کمال الدین چترالی نے کہا کہ ایک مہینہ گزرنے کے باوجود بھی پبلک سروس کمیشن نے وہ رزلٹ شائع نہیں کیا۔ ان کا کہنا ہے کہ جب ہم وہاں جاکر پوچھتے ہیں تو ہمیں بتایا گیا کہ تین نومبر 2021 کو صوبائی اسمبلی کا اجلاس ہوا تھا جس میں یہ فیصلہ ہوا تھا کہ PMS کی ایک پچیس پالیسی کو نیل ایڈ وایڈ یعنی کالعدم قراردیا جائے جس کی وجہ سے آپ کا رزلٹ شائع نہیں کیا گیا۔
کما الدین نے بتایا ہمارا امتحان بھی باالکل اسی طرح ہوا تھا جو پچھلے بیجز کے ASI کی آسامیوں کیلئے ہوا تھا جو آج حاضر سروس ہیں اور نوکری کررہے ہیں۔ انہوں نے مزید کہا کہ جب ہم اس آسامی کیلئے امتحان دے رہے تھے تو نہ یہ پالیسی نافذ ہوئی تھی اور نہ اس طرح کا کوئی قانون تھا جس کے باعث ہمارا رزلٹ روک دیا جائے۔ انہوں نے کہا کہ ہم پر یہ پالیسی مرتب کی جارہی ہے جو سراسر زیادتی اور ظلم کے مترادف ہے انہوں نے کہا ہم 1043 امیدواران پچھلے چار سالوں سے روزانہ پبلک سروس کمیشن کا چکر لگا رہے ہیں اور اکثر و بیشتر صوبائی اسمبلی کے سامنے احتجاج بھی کرتے ہیں مگر ہماری کوئی شنوائی نہیں ہوئی۔اب تو ہم عمر رسیدہ یعنی Over Age بھی ہوچکے ہیں اور ہمارے لئے دوسرے دروازے بھی بند ہوئے۔ انہوں نے کہا کہ یہ صرف 1043 امیدوار نہیں بلکہ اتنے ہی حاندان متاثر ہورہے ہیں۔ انہوں نے چیف جسٹس پشاور ہائی کورٹ اور وزیر اعلےٰ ٰخبر پحتون خواہ سے اپیل کی ہے کہ پبلک سروس کمیشن کے ذریعے انہوں نے جو ٹیسٹ انٹرویو پاس کیا ہے انہیں اے ایس آئی کی آسامیوں پر بھرتی کیا جائے تاکہ ان کے گھر کا چولہا بھی جلتا رہے

اترپردیش(ویب ڈیسک) بھارت میں ایک بارات کے ساتھ ناخوش گوار واقعہ پیش آنے پر خوشی کی تقریب غمی میں بدلتے بدلتے رہ گئی، جب دلہن کے گاؤں کے قریب پہنچتے ہی دلہا کار سے اتر کر بھاگ گیا، اور باراتی بھی بھاگ کر چھپ گئے۔مذکورہ بالا واقعہ ریاست اترپردیش کے شہر رام پور میں پیش آیا، جب گاؤں رسول پور میں اسرار سلمانی نامی شہری کی بیٹی کے لیے گاؤں جالف نگلا سے بارات آ رہی تھی، اور وہ سب بارات کے منتظر تھے۔بارات ابھی دلہن کے گاؤں کے قریب ہی پہنچی تھی کہ لوگوں نے عجیب واقعہ دیکھا، لوگوں نے دیکھا کہ دلہے کی کار سے اچانک دلہا نکلا اور بھاگ کھڑا ہوا، دلہے کو بھاگتے دیکھ کر باراتی بھی ڈر کے مارے بھاگے اور کہیں چھپ گئے۔ہنگامہ تھمنے کے بعد معلوم ہوا کہ گاؤں کے قریب آ کر سڑک پر دلہے کی کار کی زد میں ایک 5 سالہ بچہ آ کر مر گیا تھا، جس پر دلہا کار سے نکلا اور بھاگ کر ایک گھر میں جا کر چھپ گیا، یہ دیکھ کر باراتی بھی فوراً گاڑیوں سے اتر کر ادھر ادھر چھپ گئے۔بارات میں یہ افراتفری دیکھ کر دلہن والے پہلے تو حیران ہو گئے، اور پھر پریشانی میں معاملہ سنبھالنے لگ گئے، گاؤں والوں نے کافی دیر تک تلاش کیا تب جا کر سبھی باہر آئے۔واقعے کے فوراً بعد پولیس بھی جائے وقوعہ پر پہنچ گئی اور لاش کو اپنے قبضہ میں لے کر پوسٹ مارٹم کے لیے بھیج دیا، بعد ازاں دلہن والوں نے فریقین کے درمیان سمجھوتا کرایا، جس کے بعد ہی آخر کار دلہا دلہن کا نکاح ہو سکا

اسلام آباد (اے ایف بی)عوام پر پھر پٹرول بم گرانے کی تیاریاں، یوکرین پر روس کے حملے کے بعد پاکستان میں پٹرولیم مصنوعات کی قیمتوں میں مزید 9.59 روپے فی لیٹر اضافے کا امکان ہے جس کا اطلاق یکم مارچ 2022 سے ہوگا۔ حکومت نے پٹرولیم مصنوعات کی قیمتوں میں 12.03 روپے فی لیٹر تک ریکارڈ اضافہ کیا تھا، جس کا اطلاق 16 فروری سے پٹرول کی قیمت 159.86 روپے فی لیٹر کی ریکارڈ سطح پر ہے،16 فروری کو خام تیل کی قیمت 94 ڈالر فی بیرل یومیہ تھی۔یوکرین پر روسی حملے کے نتیجے میں قیمتوں میں اضافہ ہوا جو 2014 کے بعد پہلی بار 100 ڈالر فی بیرل سے تجاوز کر گئی۔

دوسری جانب صنعتی ماہرین کا کہنا ہے کہ روس نے 2014 میں کریمیا کے خلاف اس وقت جارحیت کی تھی جب اس نے پٹرولیم مصنوعات کے ذریعے فنڈز اکٹھے کئے تھے،ان کا کہنا تھا کہ امریکا کے پاس شیل آئل بھی ہے لیکن یہ مہنگا ہے تاہم امریکا اسے عالمی منڈی میں لانے کی کوشش کر سکتا ہے تاکہ روسی ریونیو کو نقصان پہنچانے کیلئے پٹرولیم مصنوعات کی قیمتوں میں کمی کی جا سکے،ایک خیال یہ بھی ہے کہ امریکا شاید ایران پر عائد پابندیاں نرم کردے تاکہ وہ اسے عالمی مارکیٹ میں تیل کی فروخت کی اجازت ملے اور اس طرح فی بیرل پیٹرول کی قیمت ایک بار پھر 65 ڈالر کی سطح پر آجائے تاہم ایران کے ساتھ روس کے ساتھ تعلقات دیرینہ ہیں اسی لئے اس آپشن پر عمل مشکل نظر آتا ہے۔

کراچی (اے ایف بی)عامر لیاقت نے انکشاف کیا کہ طوبیٰ سے میری شادی ختم نہیں ہوئی وہ ابھی بھی میری بیوی ہیں کیونکہ میں نے انہیں طلاق نہیں دی ۔عامرلیاقت کی تیسری اہلیہ دانیہ شاہ نے طوبیٰ انور سے متعلق کہا کہ طوبیٰ سے کوئی مسئلہ نہیں، واپس آئیں تو بڑی بہن سمجھوں گی۔عامر لیاقت حال ہی میں تیسری اہلیہ دانیہ شاہ کے ہمراہ انٹرویو دیتے ہوئے کہا کہ طوبیٰ سے میری شادی ختم نہیں ہوئی وہ ابھی بھی میری بیوی ہیں کیونکہ میں نے انہیں طلاق نہیں دی ہے۔ عامر لیاقت کا کہنا تھا کہ میں آج بھی طوبیٰ کی عزت کرتا ہوں، میں نے کبھی بھی انہیں برے الفاظ میں یاد نہیں کیا، اگر آج بھی وہ آنا چاہیں تو میرے گھر کے دروازے ان کے لیے کھلے ہیں۔ طوبیٰ کی واپسی سے متعلق پوچھے جانے والے سوال پر دانیہ شاہ نے کہا کہ اگر طوبیٰ واپس آنا چاہیں تو مجھے کوئی مسئلہ نہیں ہوگا، انہیں بڑی بہن سمجھوں گی۔ان کا کہنا تھا کہ عامر لیاقت کو ایک اور شادی کی اجازت اس لیے دی کہ ایک بیوی کی خوشی اس کے شوہر کی خوشی میں ہوتی ہے۔

عامرلیاقت کی تیسری اہلیہ دانیہ شاہ نے پی ٹی آئی رہنما کی دوسری اہلیہ طوبیٰ انور سے متعلق اپنے خیالات کا اظہار کیا ہے۔ انکا کہنا ہے کہ طوبیٰ سے کوئی مسئلہ نہیں، واپس آئیں تو بڑی بہن سمجھوں گی واضح رہے کہ عامر لیاقت حسین نے لودھراں سے تعلق رکھنے والی دانیہ شاہ سے تیسری شادی کی ہے۔ عامر لیاقت اور طوبیٰ انور نے 2018 میں شادی کی تھی لیکن ان کی شادی زیادہ عرصے نہ چل سکی۔اداکارہ و ماڈل طوبی انور نے تصدیق کی ہے کہ انہوں نے پاکستان تحریک انصاف (پی ٹی آئی) کے رکن قومی اسمبلی اور ٹی وی میزبان و اسکالر عامر لیاقت حسین سے خلع لےلیا۔ ان کے قریبی رشتے دار اور دوست جانتے ہیں کہ انہوں نے 14 ماہ قبل ہی شوہر سے علیحدگی اختیار کی تھی۔اداکارہ نے شوہر سے علیحدگی کا سبب بتائے بغیر بتایا کہ انہیں صلح کی کوئی صورت نظر نہیں آئی، جس کے بعد انہوں نے مجبور ہوکر خلع لےلیا۔

لاہور(اے ایف بی)پاکستان کرکٹ بورڈ نے آسٹریلیا کے خلاف سیریز کے تمام ٹکٹس کو ڈیجیٹیلائزڈ کردیا، اب ٹکٹس پہلے کی طرح پرنٹ نہیں ہوا کریں گے، صرف موبائل پر کیو آر کوڈ اسکین ہوگا۔ذرائع کے مطابق پی سی بی ٹکٹ فروخت کرنے والے ادارے بک می ڈاٹ پی کے، کی معاونت سے ٹکٹس میں جدت لائی ہے۔ پی ایس ایل کے کامیاب تجربے کے بعد اب کاغذ پر ٹکٹوں کی پرنٹنگ ختم کرکے اسے موبائل پر منتقل کردیا گیا ہے۔

اب ٹکٹس کی بکنگ کے بعد اس کا پرنٹ لینے کی بھی ضرورت نہیں پڑے گی۔ آن لائن رائج آسان طریقہ کار کے تحت ٹکٹ بک کروانے کے بعد کیو آر کوڈ موبائل اسکرین پر دکھانا کافی ہوگا، یعنی اب واٹس اپ کے ذریعے ہی ٹکٹس کی دستیابی یقینی بنادی گئی ہے۔آن لائن بکنگ کے ساتھ اب اعزازی پاسز/ ٹکٹس کی پرنٹنگ بھی نہیں ہوا کرے گی۔ یہ کمپلیمنٹری ٹکٹس بھی موبائل پر منتقل کردئیے گئے ہیں۔ پی ایس ایل میں موبائل پر کیو آر کوڈ اسکین کے ساتھ کاغذ پر بھی ٹکٹس پرنٹ کیے گئے تھے۔

تماشائیوں کو پرنٹ آؤٹ بھی ساتھ لانے کی اجازت تھی تاہم اب مزید آسانی پیدا کردی گئی ہے۔ تماشائیوں کو کاغذی کارروائی کے جھنجٹ سے بھی چھٹکارا مل گیا ہے۔ اب بس خریدے گئے یا مفت میں ملنے والے ٹکٹس کو موبائل اسکرین کے ذریعے ٹکٹس چیک کرنے والے عملے کو دکھاکر اسٹیڈیم میں داخل ہوا جاسکےگا۔

لاہور (اے ایف بی)لاہور میں گزشتہ سال مختلف وجوہات پر 100 خواتین کے قتل کا انکشاف ، گھریلو جھگڑوں پر ماری جانے والی 45 خواتین کے ایک ملزم کو بھی سزا نہ ہو سکی۔ پولیس حکام کے مطابق خواتین کے کیسز میں سزا کی شرح 5 فیصد سے بھی کم ہے۔غیرت کا معاملہ ہو، گھریلو جھگڑے پر غصہ نکالنا ہو ، یا مخالفین سے دیرینہ رنجش ہو، خواتین ہر حال میں آسان ہدف ہیں جنہیں کبھی بھی کسی بھی وقت نشانہ بنایا جا سکتا ہے۔ پولیس ریکارڈ کے مطابق گذشتہ سال شہر میں ایک سو خواتین کو بے دردی سے قتل کیا گیا ۔45 خواتین کو گھریلو لڑائی جھگڑوں کی قیمت ادا کرنا پڑی، پانچ خواتین کو غیرت کے نام پر موت کے گھاٹ اتارا گیا۔

50 خواتین کے قتل کیسز میں کسی ایک کیس کے ملزم کو بھی سزا نہ ہو سکی۔۔ حکام کا خود ماننا ہے کہ ایسے کیسز میں سزا کی شرح 5 فیصد سے بھی کم ہے۔پولیس کے مطابق گھریلو جھگڑوں پر قتل ہونے والی خواتین کے ملزمان ان کے اپنے اہلخانہ ہوتے ہیں جس کی وجہ سے کیس کی پیروی ہی نہیں کی جاتی۔۔ قانون موجود ہے لیکن اس پر عمل درآمد کی ضرورت ہے۔

کراچی(اے ایف بی )ملکی تاریخ میں پہلی بار سندھ میں 50 ہزار اساتذہ کو نوکریوںکے آفر لیٹر تقسیم کئے جائیں گے، ٹیسٹ میں 5 لاکھ امیدواران میں سے 50 ہزار کے لگ بھگ امیدوار میرٹ پر پاس ہوئے تھے۔تفصیلات کے مطابق پیپلز پارٹی نے مارچ سے قبل ملازمت فراہم کرنے کا فیصلہ کرلیا ، محکمہ تعلیم سندھ آج 50ہزار اساتذہ کو ملازمتیں دے گی۔آئی بی اے سکھر سے ٹیسٹ پاس کرنیوالے اساتذہ کے آفر لیٹر تیار ہے، آج سندھ کے مختلف اضلاع میں آفر لیٹر تقسیم کئےجائیں گے۔پی ایس ٹی ، جے ایس ٹی اوردیگر کیٹگری میں اساتذہ کو ملازمتوں کے آفر لیٹر دیے جائیں گے، صوبائی وزیر تعلیم کراچی ساؤتھ کے پاس امیدواران کو آج لیاری کے سرکاری اسکول میں منعقدہ تقریب میں نوکریوں کے آفر آرڈرز تقسیم کریں گے۔

سندھ میں پچاس ہزار سے زائد سرکاری نوکریوں آفر آرڈر کل سے تقسیم کئے جائیں گے، سندھ بھر میں 35 ہزار پی ایس ٹی اور 17 جے ای ایس ٹی اساتذہ بھرتی کیے جائیں گے۔اس کے علاوہ شہر قائد کراچی 8635 پی ایس ٹی اور جی ایس ٹی ٹیچرز کو بھرتی آرڈر دیئے جائیں گے جبکہ حیدرآباد میں 10 ہزار 275 پی ایس ٹی اور جی ای ایس ٹی اساتذہ بھرتی ہوں گے۔اسی طرح سکھر ڈویڑن میں 7ہزار 871 اساتذہ ،لاڑکانہ میں چھ ہزار پی ایس ٹی اور جے ای ایس ٹی ٹیچرز ،شہید بنظیر آباد ڈویڑن میں 6252 پی ایس ٹی جے ای ایس ٹی ٹیچرزْ ،میرپورخاص میں 5 ہزار 70 اساتذہ نے ٹیسٹ پاس کیا ، جنہیں آفر آرڈر دیئے جائیں گے